ദുബൈ: യു.എ.ഇയുടെ ചാന്ദ്രദൗത്യമായ റാശിദ് റോവര് തയാറെടുപ്പുകള് പൂര്ത്തിയാക്കിയതായി ദുബൈ കിരീടാവകാശിയും എക്സിക്യൂട്ടിവ് കൗണ്സില് ചെയര്മാനുമായ ശൈഖ് ഹംദാന് ബിന് മുഹമ്മദ് ബിന് റാശിദ് ആല് മക്തൂം.
ചന്ദ്രനിലെത്തുന്ന ആദ്യ അറബ് രാജ്യമെന്ന ചരിത്രം തൊട്ടരികിലാണ്. ഇതിന് പിന്നില് പ്രവര്ത്തിച്ച മുഹമ്മദ് ബിന് റാശിദ് സ്പേസ് സെന്ററിലെ എന്ജിനീയര്മാരെയും സംഘാംഗങ്ങളെയും അഭിനന്ദിക്കുന്നുവെന്നും അദ്ദേഹം കൂട്ടിച്ചേര്ത്തു. ഇവരുടെ ചിത്രം സഹിതമാണ് ഹംദാന്റെ ട്വീറ്റ്.
നവംബര് ഒമ്ബതിനും 15നും ഇടയിലായിരിക്കും റാശിദ് റോവറിന്റെ വിക്ഷേപണം. ഫ്ലോറിഡയിലെ കെന്നഡി സ്പേസ് സെന്ററില്നിന്നാണ് റാശിദ് കുതിക്കുന്നത്. അടുത്തമാസം ആദ്യവാരം കൃത്യമായ തീയതി പ്രഖ്യാപിക്കും. രാജ്യത്തിന്റെ ദീര്ഘകാല ചന്ദ്രപര്യവേക്ഷണ പദ്ധതിക്ക് കീഴിലെ ആദ്യ ദൗത്യമാണിത്. ഹകുട്ടോ-ആര് മിഷന്-1 എന്ന ജാപ്പനീസ് ലാന്ഡറിലാണ് ‘റാശിദി’നെ ചന്ദ്രോപരിതലത്തില് എത്തിക്കുക. ചന്ദ്രോപരിതലത്തില്നിന്ന് ലഭ്യമാക്കുന്ന വയര്ലെസ് കമ്യൂണിക്കേഷന് സേവനങ്ങളിലൂടെയാണ് ഇമാറാത്തി എന്ജിനീയര്മാര് റോവറുമായി ബന്ധപ്പെടുക. ചന്ദ്രന്റെ വടക്കുകിഴക്കന് ഭാഗം പര്യവേക്ഷണം നടത്താനാണ് റോവര് ലക്ഷ്യമിടുന്നത്. ചന്ദ്രന്റെ മണ്ണ്, ഭൂമിശാസ്ത്രം, പൊടിപടലം, ഫോട്ടോ ഇലക്ട്രോണ് കവചം, ചന്ദ്രനിലെ ദിവസം എന്നിവ ദൗത്യത്തിലൂടെ പഠനവിധേയമാക്കും.