![“Manju”](https://santhigirinews.org/wp-content/uploads/2020/04/YOUTUBE.jpg")
കുവൈറ്റ്: പ്രവാസികള്‍ക്ക് ഡ്രൈവിംഗ് ലൈസന്‍സ് നല്‍കുന്നതില്‍ കൂടുതല്‍ നിയന്ത്രണങ്ങള്‍ കൊണ്ടുവരാന്‍ കുവൈറ്റ് ഭരണകൂടം ആലോചിക്കുന്നു. ഇതുമായി ബന്ധപ്പെട്ട് ട്രാഫിക് വിഭാഗം സമര്‍പ്പിച്ച ശുപാര്‍ശ ആഭ്യന്തര മന്ത്രാലയം അണ്ടര്‍ സെക്രട്ടറി ലഫ്റ്റനന്റ് ജനറല്‍ ശെയ്ഖ് ഫൈസല്‍ അല്‍ നവാഫ്, മുതിര്‍ന്ന ഉദ്യോഗസ്ഥരുമായി ചര്‍ച്ച ചെയ്തു.
പ്രവാസികള്‍ക്ക് പുതിയ ഡ്രൈവിംഗ് ലൈസന്‍സുകള്‍ നല്‍കുന്നത് നിര്‍ത്തണമെന്ന രീതിയിലാണ് ട്രാഫിക് വിഭാഗം ശുപാര്‍ശ നല്‍കിയിരിക്കുന്നത്. രാജ്യത്തെ റോഡുകളിലെ വാഹനപ്പെരുപ്പവും വാഹന അപകടങ്ങളും കുറയ്ക്കുന്നതിന്റെ ഭാഗമായാണ് നടപടിയെന്നാണ് അധികൃതര്‍ പറയുന്നത്. ട്രാഫിക് വിഭാഗത്തിന്റെ മന്ത്രാലയത്തിന്റെ നിര്‍ദ്ദേശങ്ങള്‍ യോഗത്തില്‍ വിശദമായി ചര്‍ച്ച ചെയ്തതായി അല്‍ ഖബസ് പത്രം റിപ്പോര്‍ട്ട് ചെയ്തു. പ്രവാസികള്‍ക്ക് ഡ്രൈവിംഗ് ലൈന്‍സന്‍സ് നല്‍കുന്നത് നിര്‍ത്തിവയ്ക്കുന്നതിന്റെ ഗുണവും ദോഷവും യോഗം ചര്‍ച്ച ചെയ്തുവെങ്കിലും ഇക്കാര്യത്തില്‍ അന്തിമ തീരുമാനം എടുത്തിട്ടില്ല.
പ്രവാസികള്‍ക്ക് ഡ്രൈവിംഗ് ലൈസന്‍സ് നല്‍കുന്നത് പൂര്‍ണമായി നിര്‍ത്തിവയ്ക്കുന്നതിന് പകരം, അതിനുള്ള നിബന്ധനകള്‍ കൂടുതല്‍ കര്‍ക്കശമാക്കാനാണ് അണ്ടര്‍ സെക്രട്ടറി നിര്‍ദ്ദേശം നല്‍കിയിരിക്കുന്നതെന്നാണ് റിപ്പോര്‍ട്ട്. ഇക്കാര്യത്തെ കുറിച്ച്‌ കൂടുതല്‍ പഠിച്ച്‌ റിപ്പോര്‍ട്ട് സമര്‍പ്പിക്കുന്നതിനായി ഒരു പ്രത്യേക സമിതിക്ക് യോഗം രൂപം നല്‍കിയതായും പത്രം റിപ്പോര്‍ട്ട് ചെയ്തു.
അതോടൊപ്പം അടുത്ത കാലത്തായി പ്രവാസികള്‍ക്ക് അനുവദിച്ച ഡ്രൈവിംഗ് ലൈസന്‍സുകളുടെ എണ്ണവും അത് രാജ്യത്തെ ഗതാഗത സംവിധാനങ്ങളിലുണ്ടാക്കിയ പ്രതിഫലനവും പഠനവിധേയമാക്കി റിപ്പോര്‍ട്ട് നല്‍കാനും അണ്ടര്‍ സെക്രട്ടറി ബന്ധപ്പെട്ടവര്‍ക്കു നിര്‍ദ്ദേശം നല്‍കി. 14,600 പ്രവാസികളുടെ ഡ്രൈവിംഗ് ലൈസന്‍സ് കുവൈറ്റ് അധികൃതര്‍ ഈയിടെ റദ്ദാക്കിയിരുന്നു. അനധികൃതമായാണ് അവ കൈവശം വച്ചിരിക്കുന്നതെന്ന കണ്ടെത്തലിന്റെ അടിസ്ഥാനത്തിലായിരുന്നു ഇത്.
തൊഴിലിന്റെ അടിസ്ഥാനത്തില്‍ ഡ്രൈവര്‍മാര്‍ ഉള്‍പ്പെടെയുള്ളവര്‍ക്ക് നല്‍കുന്ന ലൈസന്‍സ് അവരുടെ ജോലി മാറുന്നതോടെ അസാധുവാകുമെന്നാണ് നിയമമെങ്കിലും അത് തുടര്‍ന്നും ഉപയോഗിക്കുന്ന കേസുകള്‍ നിരവധിയാണെന്ന് അധികൃതര്‍ അറിയിച്ചു. അതോടൊപ്പം ഏത് പ്രൊഫഷനില്‍ ജോലി ചെയ്യുന്നവര്‍ക്കും നല്‍കുന്ന ഡ്രൈവിംഗ് ലൈസന്‍സ് വിസ കാലാവധി തീരുന്നതോടെ അവസാനിക്കും. വിദേശ വിദ്യാര്‍ഥികള്‍ക്ക് താല്‍ക്കാലികമായി നല്‍കുന്ന ഡ്രൈവിംഗ് ലൈസന്‍സ് പഠനം പൂര്‍ത്തിയായ ശേഷവും ഉപയോഗിക്കുന്ന കേസുകളും കുറവല്ലെന്ന് അധികൃതര്‍ അറിയിച്ചു. രാജ്യത്ത് ഇഷ്യൂ ചെയ്തിരിക്കുന്ന 15 ലക്ഷം ഡ്രൈവിംഗ് ലൈസന്‍സുകളില്‍ 8.5 ലക്ഷം ലൈസന്‍സികളും പ്രവാസികള്‍ക്കാണ് നല്‍കിയിരിക്കുന്നതെന്നാണ് കണക്കുകള്‍. 48 ലക്ഷം വരുന്ന കുവൈറ്റ് ജനസംഖ്യയില്‍ 34 ലക്ഷം പേരും വിദേശികളാണ്.
