പോസ്റ്റല്‍ വോട്ടിനുള്ള അപേക്ഷ ഇന്ന് കൂടി നല്‍കാം

ലോക്സഭ തിരഞ്ഞെടുപ്പില്‍ പോസ്റ്റല്‍ വോട്ട് ചെയ്യാൻ അർഹരായ വിഭാഗങ്ങള്‍ക്ക് പോസ്റ്റല്‍ വോട്ടിനുള്ള അപേക്ഷ ഇന്ന് (ഏപ്രില്‍ 02) കൂടി നല്‍കാം എന്ന് മുഖ്യ തിരഞ്ഞെടുപ്പ് ഓഫീസർ സഞ്ജയ് കൗള്‍ അറിയിച്ചു. വോട്ടർ പട്ടികയില്‍ പേരുള്ള ലോക്‌സഭാ മണ്ഡലത്തിലെ വരണാധികാരിക്കാണ് അപേക്ഷ നല്‍കേണ്ടത്. നിലവില്‍ ജോലി ചെയ്യുന്ന ജില്ലയിലെ നോഡല്‍ ഓഫീസർമാർ വഴിയോ നേരിട്ടോ അപേക്ഷ സമർപ്പിക്കാം.

ആബ്സെന്റീ വോട്ടർ വിഭാഗത്തില്‍പ്പെട്ടവർക്കാണ് തിരഞ്ഞെടുപ്പ് കമ്മീഷൻ പോസ്റ്റല്‍ വോട്ട് ചെയ്യാൻ അവസരം നല്‍കുന്നത്. 85 വയസ്സിന് മുകളില്‍ പ്രായമുള്ളവർ, 40 ശതമാനത്തില്‍ കുറയാതെ അംഗപരിമിതിയുള്ള ഭിന്നശേഷിക്കാർ, കോവിഡ് 19 രോഗമുള്ളവരോ കോവിഡ് സംശയിക്കുന്നവരോ ആയവർ, അവശ്യസേവന വിഭാഗങ്ങളില്‍ ജോലി ചെയ്യുന്നവർ എന്നിവർക്കാണ് പോസ്റ്റല്‍ വോട്ട് ചെയ്യാൻ അവസരം ലഭിക്കുക. പോസ്റ്റല്‍ ബാലറ്റ് വഴി വോട്ട് ചെയ്യാൻ ആഗ്രഹിക്കുന്നവർ ആവശ്യമായ രേഖകള്‍ സഹിതം ഫോം 12 ഡിയില്‍ ബന്ധപ്പെട്ട വരണാധികാരിക്ക് അപേക്ഷ നല്‍കണം. ആബ്സന്റീ വോട്ടർമാരില്‍ ആദ്യ മൂന്ന് വിഭാഗങ്ങളില്‍ ഉള്‍പ്പെടുന്നവർക്ക് ബൂത്ത് തല ഓഫീസർമാർ വഴി വീട്ടിലെത്തി വോട്ട് ചെയ്യാൻ അവസരം ഒരുക്കും.

നാലാമത്തെ വിഭാഗമായ അവശ്യസേവന വിഭാഗത്തില്‍ ഉള്‍പ്പെടുത്തി വിജ്ഞാപനം പുറപ്പെടുവിച്ചിട്ടുള്ളവർക്കും പോസ്റ്റല്‍ വോട്ട് ചെയ്യാം. പൊലീസ്, ഫയർഫോഴ്സ്, ജയില്‍, എക്സൈസ്, മില്‍മ, ഇലക്‌ട്രിസിറ്റി, വാട്ടർ അതോറിറ്റി, കെഎസ്‌ആർടിസി, ട്രഷറി, ആരോഗ്യം, ഫോറസ്റ്റ്, കേന്ദ്രസർക്കാർ സ്ഥാപനങ്ങള്‍ (ആകാശവാണി, ദൂരദർശൻ, ബിഎസ്‌എൻഎല്‍, റെയില്‍വേ, പോസ്റ്റ് ആന്റ് ടെലഗ്രാഫ് തുടങ്ങിയവ), മാധ്യമപ്രവർത്തകർ, കൊച്ചി മെട്രോ റെയില്‍ എന്നിവയാണ്.

ഈ വിഭാഗങ്ങളിലെ ജീവനക്കാർ 12ഡി ഫോമില്‍ അതത് നോഡല്‍ ഓഫീസർമാർ വഴിയോ നേരിട്ടോ വരണാധികാരിക്ക് അപേക്ഷ നല്‍കുകയാണ് വേണ്ടത്. തിരഞ്ഞെടുപ്പ് വിജ്ഞാപനം വന്നതിന് ശേഷം അഞ്ച് ദിവസത്തിനുള്ളിലാണ് അപേക്ഷ നല്‍കേണ്ടത്. മാർച്ച്‌ 28 ന് സംസ്ഥാനത്തെ തിരഞ്ഞെടുപ്പ് വിജ്ഞാപനം പുറപ്പെടുവിച്ചതിനാല്‍ പോസ്റ്റല്‍ വോട്ടിന് അപേക്ഷ വോട്ടർ പട്ടികയില്‍ പേരുള്ള മണ്ഡലത്തിലെ വരണാധികാരിക്ക് സമർപ്പിക്കേണ്ട അവസാന തീയതി ഏപ്രില്‍ രണ്ടാണ്.

അപേക്ഷ നല്‍കിയ ജീവനക്കാർക്ക് അതത് പാർലമെന്റ് മണ്ഡലത്തില്‍ പൊതുതിരഞ്ഞെടുപ്പ് തീയതിയായ ഏപ്രില്‍ 26 ന് മൂന്ന് ദിവസം മുമ്പുള്ള തുടർച്ചയായ ഏതെങ്കിലും മൂന്ന് ദിവസങ്ങളില്‍ പോസ്റ്റല്‍ വോട്ടിങ് കേന്ദ്രം ഒരുക്കും. ഈ കേന്ദ്രങ്ങളിലെത്തി ജീവനക്കാർക്ക് വോട്ട് ചെയ്യാനാവും. രാവിലെ ഒന്‍പത് മുതല്‍ വൈകിട്ട് അഞ്ച് മണി വരെയാണ് പോസ്റ്റല്‍ വോട്ടിങ് കേന്ദ്രം പ്രവർത്തിക്കുക.