ഡല്ഹിയിലും ഒമിക്രോണ് സ്ഥിരീകരിച്ചു. ടാന്സാനിയയില് നിന്ന് ഡല്ഹിയിലെത്തിയ ഒരാള്ക്കാണ് ഒമിക്രോണ് വകഭേദം സ്ഥിരീകരിച്ചത്. ഇതോടെ രാജ്യത്ത് രോഗം സ്ഥിരീകരിച്ചവരുടെ എണ്ണം അഞ്ചായി. മഹാരാഷ്ട്ര, ഗുജറാത്ത് സംസ്ഥാനങ്ങളില് ഒമിക്രോണ് കേസുകള് റിപ്പോര്ട്ട് ചെയ്തതോടെ അതീവ ജാഗ്രതയിലാണ് രാജ്യം.
വിദേശത്ത് നിന്നെത്തി കൊവിഡ് പോസിറ്റീവായവരുടെയും, സമ്പര്ക്ക പട്ടികയില് ഉള്ളവരുടെയും ജനിതക ശ്രേണീകരണം ഫലം ഉടന് ലഭിക്കും. അതിനിടെയാണ് ഡല്ഹിയിലും ഒമിക്രോണ് സ്ഥിരീകരിച്ചത്. നിലവില് ആശങ്കപ്പെടേണ്ട സാഹചര്യമില്ലെന്ന് ആരോഗ്യ മന്ത്രി സത്യേന്ദ്ര ജെയിന് വ്യക്തമാക്കി.
അതേസമയം രാജ്യത്ത് ഒമിക്രോണ് വകഭേദം സ്ഥിരീകരിക്കുന്നതിന്റെ പശ്ചാത്തലത്തില് പുതുച്ചേരിയില് വാക്സിന് നിര്ബന്ധമാക്കി ഉത്തരവിറക്കി. ആരോഗ്യ ഡയറക്ടറുടേതാണ് ഉത്തരവ്. വാക്സിന് സ്വീകരിക്കാത്തവര്ക്കെതിരെ നിയമനടപടി സ്വീകരിക്കുമെന്ന് സര്ക്കാര് വ്യക്തമാക്കി. 1973-ലെ പൊതുജനാരോഗ്യ നിയമപ്രകാരമാണ് വാക്സിന് നിര്ബന്ധമാക്കിയിരിക്കുന്നത്.