കോഴിക്കോട്: തിരുപ്പതിയില് നിന്ന് തിരിച്ചുവരുന്നതിനിടെ കോഴിക്കോട്ട് നിന്നുള്ള 45 ഓളം പേര് ആന്ധ്ര ചിറ്റൂര് ജില്ലയിലെ പോതുകാനുമ ഗ്രാമത്തില് കുടുങ്ങി.
വ്യാഴാഴ്ച ഉച്ച മൂന്ന് മണിക്ക് ബസില് കയറിയ സംഘം രാത്രി പത്ത് മണിയായിട്ടും മുന്നോട്ടുപോവാന് കഴിയാതെ വഴിയില് കിടക്കുകയാണെന്ന് യാത്രാസംഘത്തിലുള്ള അഡ്വ. മോഹന്ദാസ് ഫോണിലൂടെ ‘മാധ്യമ’ത്തെ അറിയിച്ചു. രക്ഷാപ്രവര്ത്തനത്തിന് ആരും എത്തിയിട്ടില്ല. മഴ ശക്തമായി തുടരുകയാണ്. എന്താണ് സംഭവിക്കുക എന്ന് പറയാനാവാത്തത്ര ഭീതിയിലാണ് യാത്രക്കാര്. ഇടുങ്ങിയ റോഡിനിരുവശവും കാടായതിനാല് ഭീതിജനകമാണ് അവസ്ഥയെന്ന് അദ്ദേഹം പറഞ്ഞു.
വ്യാഴാഴ്ച രാത്രി 10.10നുള്ള ട്രെയിനില് നാട്ടിലേക്ക് വരാന് പുറപ്പെട്ടതായിരുന്നു. തമിഴ്നാട് സര്ക്കാര് ബസിലാണ് ഇവര് സഞ്ചരിക്കുന്നത്. പൊലീസോ മറ്റ് അധികൃതരോ സഹായത്തിനെത്തിയിട്ടില്ലെന്ന് മോഹന് ദാസ് അറിയിച്ചു.