മനു നായർ
ആലപ്പുഴ: കായംകുളത്ത് ഡിവൈഎഫ്ഐയിൽ കൂട്ടരാജി. 21 അംഗ ബ്ലോക്ക് കമ്മിറ്റിയിലെ 19 പേരും രാജിവച്ചു. കായംകുളം എംഎൽഎ യു. പ്രതിഭയും ഡിവൈഎഫ്ഐയിലെ ഒരു വിഭാഗം നേതാക്കളുമായുള്ള തർക്കമാണ് രാജിക്ക് കാരണമെന്നാണ് റിപ്പോർട്ടുകൾ. ഡിവൈഎഫ്ഐ കായംകുളം മേഖല സെക്രട്ടറിയും പ്രസിഡന്റും ഉൾപ്പെടെ രാജിവച്ചിട്ടുണ്ട്.
ഡിവൈഎഫ്ഐ ജില്ലാ കമ്മിറ്റിക്കും സിപിഎം ഏരിയാ കമ്മിറ്റിക്കും പ്രവര്ത്തകര് രാജിക്കത്ത് കൈമാറിയതായും റിപ്പോർട്ടുകൾ പുറത്തുവരുന്നുണ്ട്. അതേസമയം, കൂട്ടരാജിയെക്കുറിച്ച് അന്വേഷിച്ച് റിപ്പോർട്ട് നൽകാൻ സിപിഎം ജില്ലാ നേതൃത്വം നിർദേശം നൽകി.
അടുത്തിടെ ഡിവൈഎഫ്ഐ ബ്ലോക്ക് വൈസ് പ്രസിഡന്റിന്റെ വീട്ടിൽ കായംകുളം സിഐ തോക്കുമായി എത്തി പരിശോധന നടത്തിയത് ഡിവൈഎഫ്ഐ നേതാക്കളിൽ പ്രതിഷേധത്തിന് കാരണമായിരുന്നു. സിഐയെ പിന്തുണക്കുന്നത് എംഎൽഎയാണെന്ന് ഡിവൈഎഫ്ഐ ആരോപിച്ചിരുന്നു.