സിന്ധുമോള് ആര്
കണ്ണൂര്: പതിനാലുകാരന് കോവിഡ് ബാധിച്ചതിനെ തുടര്ന്ന് അടച്ചു പൂട്ടിയ കണ്ണൂര് നഗരം വ്യാഴാഴ്ച തുറക്കും. ഇന്നു ചേരുന്ന ദുരന്തനിവാരണ അതോറിറ്റിയുടെ യോഗത്തില് ഇക്കാര്യത്തില് തീരുമാനമാനമെടുക്കും. കണ്ടെയിന്മെന്റ് സോണായി പ്രഖ്യാപിച്ചാല് ഏഴു ദിവസം കഴിഞ്ഞാണ് പുനരവലോകനം ഉണ്ടാകുക. ഉറവിടം അറിയാത്ത മൂന്നോളം കോവിഡ് കേസുകള് റിപ്പോര്ട്ട് ചെയ്ത സാഹചര്യത്തില് ആരോഗ്യ വകുപ്പാണ് നഗരം അടച്ചിടാന് നിര്ദേശം നല്കിയത്. തുടര്ന്നാണ് കഴിഞ്ഞ 18 മുതല് കണ്ണൂര് നഗരം അടച്ചു പൂട്ടിയത്. അതേ സമയം പതിനാലുകാരന്റെ രണ്ടാമത്തെ കോവിഡ് പരിശോധനാ ഫലം നെഗറ്റീവായിരുന്നു. പിതാവിനും വിദ്യാര്ഥിയെ ആദ്യം പരിശോധിച്ച ഡോക്ടര്ക്കും കോവിഡ് ബാധയില്ലെന്ന് കഴിഞ്ഞ ദിവസം സ്ഥിരീകരിച്ചിരുന്നു. കണ്ണൂര് നഗരം അനിശ്ചിതമായി അടച്ചിടുന്നതിനെതിരെ വ്യാപാരികളും രംഗത്തുവന്നിട്ടുണ്ട്. നിയന്ത്രണങ്ങളോടെ ഇളവു നല്കണമെന്നാണ് വ്യാപാരികളുടെ ആവശ്യം. നഗരത്തിലേക്കുള്ള എല്ലാ പോക്കറ്റു റോഡുകളും പോലീസ് അടച്ചിരുന്നു.