ഏഴ് ഓസ്കറുമായി ‘എവരിതിങ് എവരിവേര് ഓള് അറ്റ് വണ്സ്
ലോസ് എയ്ഞ്ചല്സ്: ഓസ്കറില് ഏറ്റവും കൂടുതല് പുരസ്കാരങ്ങള് വാരിക്കൂട്ടിയത് ‘എവരിതിങ് എവരിവേര് ഓള് അറ്റ് വണ്സ്’, ‘ഓള് ക്വയ്റ്റ് ഓണ് ദ വെസ്റ്റേണ് ഫ്രണ്ട്’ എന്നീ ചിത്രങ്ങള്.മികച്ച സിനിമക്കുള്ള പുരസ്കാരം ഉള്പ്പെടെ ഏഴ് പുരസ്കാരങ്ങളാണ് ‘എവരിതിങ് എവരിവേര് ഓള് അറ്റ് വണ്സി’ന് ലഭിച്ചത്. മികച്ച സിനിമക്ക് പുറമെ മികച്ച സംവിധായകന്, തിരക്കഥ, മികച്ച നടി, സഹനടി, സഹനടന്, എഡിറ്റിങ് എന്നീ പുരസ്കാരങ്ങളും ചിത്രം സ്വന്തമാക്കി.
10 വിഭാഗങ്ങളിലായി 11 നോമിനേഷനാണ് എവരിതിങ് എവരിവേര് ഓള് അറ്റ് വണ്സിനുണ്ടായിരുന്നത്. ‘ഡാനിയല്സ്’ എന്നറിയപ്പെടുന്ന ഡാനിയേല് ക്വാന്, ഡാനിയേല് ഷൈനര്ട്ട് എന്നിവര് ചേര്ന്ന് സംവിധാനം ചെയ്ത സിനിമയിലെ അഭിനയത്തിന് മിഷേല് യോ മികച്ച നടിയായും കി ഹൂയ് ക്വിവാന് മികച്ച സഹനടനായും ജെയ്മി ലീ കേര്ടിസ് മികച്ച സഹനടിയായും തെരഞ്ഞെടുക്കപ്പെട്ടു.
ജര്മനിയില്നിന്നുള്ള ‘ഓള് ക്വയ്റ്റ് ഓണ് ദ വെസ്റ്റേണ് ഫ്രണ്ട്’ നാല് വിഭാഗങ്ങളിലാണ് പുരസ്കാരം നേടിയത്. എഡ്വാര്ഡ് ബെര്ജര് സംവിധാനം ചെയ്ത സിനിമക്ക് ഒമ്ബത് നോമിനേഷനാണ് ലഭിച്ചിരുന്നത്. മികച്ച ഒറിജിനല് സ്കോര്, മികച്ച അന്താരാഷ്ട്ര ഫീച്ചര് ഫിലിം, മികച്ച സിനിമാട്ടോഗ്രഫി, മികച്ച പ്രൊഡക്ഷന് ഡിസൈന് എന്നിവയിലാണ് പുരസ്കാരങ്ങള് ലഭിച്ചത്.