അർപ്പിത മുഖർജിക്ക് സമ്മാനിച്ചത് ബെൻസും മിനി കൂപ്പറും; അറസ്റ്റിന് മുൻപ് രണ്ടെണ്ണം ബുക്ക് ചെയ്തു

കൊൽക്കത്ത : തൃണമൂൽ കോൺഗ്രസ് മുൻ മന്ത്രി പാർത്ഥ ചാറ്റർജി, നടി അർപ്പിത മുഖർജിക്ക് സമ്മാനിച്ചത് ആഢംബര കാറുകൾ. മെർസിഡിസ് ബെൻസ് മിനി കൂപ്പർ ഉൾപ്പെടെയുളള കാറുകളാണ് സമ്മാനിച്ചിരുന്നത്. ഈ വാഹനത്തിൽ തന്നെയാണ് ഇരുവരും യാത്ര ചെയ്തിരുന്നത്. എന്നാൽ ഈ കാറുകൾ മുഖർജിയുടെ വീട്ടിലെ പാർക്കിംഗിൽ നിന്നും കാണാതായിട്ടുണ്ട്.

ബെൻസും കൂപ്പറുമാണ് കാണാതായിരിക്കുന്നത്. ഇതിനകത്ത് വെച്ച് ഇവർ പാർട്ടി നടത്തിയിരുന്നതായും വിവരമുണ്ട്. ഇത് കൂടാതെ രണ്ട് ആഢംബര കാറുകളും ബുക്ക് ചെയ്തിരുന്നു. കാറിനായി അഡ്വാൻസും നൽകിയിരുന്നതാണ്. എന്നാൽ വാഹനം ലഭിക്കുന്നതിന് മുൻപ് തന്നെ ഇരുവരെയും ഇഡി അറസ്റ്റ് ചെയ്തു. അറസ്റ്റിന് പിന്നാലെ കാണാതായ കാറുകൾക്ക് വേണ്ടിയുള്ള തിരച്ചിലിലാണ് ഇഡി.

ബംഗാളിൽ അദ്ധ്യാപക നിയമന അഴിമതി കേസിലാണ് മന്ത്രിയായിരുന്ന പാർത്ഥ ചാറ്റർജിയെ അറസ്റ്റ് ചെയ്തത്. തുടർന്ന് ഇയാളുടെ സഹായി അർപ്പിത മുഖർജിയുടെ ഉടമസ്ഥതയിലുള്ള രണ്ട് ഫ്ളാറ്റുകളിൽ നിന്ന് 50 കോടി രൂപയോളം പണവും സ്വർണവും വിദേശ കറൻസിയും കണ്ടെടുത്തു. സംഭവത്തിൽ അർപ്പിത മുഖർജിയുടെ ബന്ധം വ്യക്തമായതോടെ ഇവരെയും അറസ്റ്റ് ചെയ്തു.

അഴിമതിയുടെ പശ്ചാത്തലത്തിൽ, മുഖ്യമന്ത്രി മമത ബാനർജി വ്യാഴാഴ്ച പാർത്ഥ ചാറ്റർജിയെ മന്ത്രി സ്ഥാനത്ത് നിന്നും ഒഴിവാക്കി. അദ്ദേഹത്തെ തൃണമൂൽ കോൺഗ്രസിൽ നിന്ന് സസ്പെൻഡ് ചെയ്യുകയും എല്ലാ പാർട്ടി സ്ഥാനങ്ങളിൽ നിന്നും നീക്കം ചെയ്യുകയും ചെയ്തിരുന്നു.