തെരുവുനായശല്യം രൂക്ഷമായി

കുണ്ടറ: മുഖത്തലയിലും പരിസരപ്രദേശങ്ങളിലും തെരുവുനായശല്യം രൂക്ഷമായി. കൂട്ടമായി അലയുന്ന നായ്ക്കള്‍ കാല്‍നട-ഇരുചക്ര വാഹനയാത്രക്കാര്‍ക്ക് ഭീഷണിയുയര്‍ത്തുകയാണ്.

രാപകല്‍ഭേദമില്ലാതെ ചുറ്റിത്തിരിയുന്ന ഇവയെ പേടിച്ചാണ് സ്ത്രീകളും കുട്ടികളുമുള്‍പ്പടെയുള്ളവരുടെ യാത്ര. കുറുമണ്ണയിലും സമീപത്തെ വയല്‍ഭാഗങ്ങളിലൂടെ കടന്നുപോകുന്ന റോഡുകളിലും നായ്ക്കളുടെ കൂട്ടം കുരച്ചും ബഹളം വച്ചും ഭീകരാന്തരീക്ഷം സൃഷ്ടിക്കുന്നത് പതിവാണ്. സന്ധ്യ കഴിയുന്നതോടെ ഏതുഭാഗത്തും ഇവ പ്രത്യക്ഷപ്പെടുന്നു. പുലര്‍ച്ചെ നടക്കാനിറങ്ങുന്നവരും പത്രവിതരണക്കാരുമെല്ലാം പേടിയോടെയാണ് യാത്രചെയ്യുന്നത്.