മുംബൈ: കോവിഡ് ബാധിച്ച് മരണപ്പെട്ട ജീവനക്കാരുടെ ആശ്രിതര്ക്ക് ശമ്പള വാഗ്ദാനവുമായി റിലയന്സ് ഇന്ഡസ്ട്രീസ്. മരണപ്പെട്ടവരുടെ ആശ്രിതര്ക്ക് അടുത്ത അഞ്ചുവര്ഷത്തേക്ക് ശമ്പളം നല്കുമെന്നാണ് റിലയന്സ് പ്രഖ്യാപിച്ചിട്ടുള്ളത്. കോവിഡ് സാഹചര്യത്തില് റിലയന്സ് ജീവനക്കാര്ക്കായി പ്രഖ്യാപിച്ച ആനുകൂല്യങ്ങളുടെ ഭാഗമായാണ് പുതിയ പ്രഖ്യാപനവും.
നേരത്തെ, അടിയന്തിര സാഹചര്യങ്ങളിലുള്ള ജീവനക്കാര്ക്ക് മൂന്നുമാസത്തേക്ക് ശമ്പളം മുന്കൂറായി നല്കി സാമ്പത്തികമായും സഹായിച്ചിരുന്നു. കോവിഡ് ബാധിച്ച ജീവനക്കാര്ക്ക് അവധി അനുവദിക്കുകയും ചെയ്തിരുന്നു. ഇതുകൂടാതെയാണ് ജീവനക്കാര്ക്ക് അത്യാഹിതം സംഭവിച്ചാല് കുടുംബത്തിന് സാമ്പത്തിക പിന്തുണ നല്കുകയും കുട്ടികളുടെ പഠന ചിലവ് ഏറ്റെടുക്കുകയും ചെയ്യുമെന്ന് റിലയന്സ് വ്യക്തമാക്കിയത്.
കോവിഡ് ബാധിച്ച് മരണപ്പെടുന്ന ജീവനക്കാരുടെ മക്കളുടെ ബിരുദപഠനം വരെയുള്ള ട്യൂഷന് ഫീസ്, ഹോസ്റ്റല് ഫീസ്, പുസ്തക ചിലവുകള് എന്നിവ റിലയന്സ് ഫാമിലി സപ്പോര്ട്ട് ആന്ഡ് വെല്ഫെയര് സ്കീം നിര്വഹിക്കുമെന്നും, ആശ്രിതരുടെ ആശുപത്രി ചിലവുകള് കമ്പനി വഹിക്കുമെന്നും അധികൃതര് വ്യക്തമാക്കി. നേരത്തെ, ജീവനക്കാര്ക്കും അവരുടെ കുടുംബത്തിനും വാക്സിനേഷനുള്ള നടപടികള് റിലയന്സ് ആരംഭിച്ചിരുന്നു.