മകന്റെ ചികിത്സയ്ക്കുള്ള പണം കുരങ്ങ് തട്ടിപ്പറിച്ചു; തിരിച്ചുവാങ്ങാന്‍ പെടാപ്പാട് പെട്ട് വൃദ്ധന്‍ !

ലക്‌നൗ: മകന്റെ ചികിത്സയ്ക്കായി വസ്തു വിറ്റ് കിട്ടിയ പണത്തിന്റെ ഒരു കെട്ട് കുരങ്ങന്‍ തട്ടിപ്പറിച്ചതോടെ വൃദ്ധന്‍ വിഷമത്തിലായി. അഞ്ഞൂറ് രൂപ നോട്ടുകളുടെ ഒരു കെട്ടാണ് കുരങ്ങ് തട്ടിയെടുത്തത്.
ഒരു മണിക്കൂര്‍ നീണ്ട ശ്രമത്തിനൊടുവില്‍ പണം തിരികെ ലഭിച്ചെങ്കിലും 7000 രൂപയുടെ നോട്ടുകള്‍ കീറിയിരുന്നു. ഉത്തര്‍പ്രദേശിലെ സീതാപൂരില്‍ ബുധനാഴ്ചയാണ് സംഭവം നടന്നത്.
ഖൈരാബാദ് സ്വദേശിയായ ഭഗ്‌വന്ദീന്‍ മകന്റെ ചികിത്സയ്ക്ക് വേണ്ടിയാണ് നാല് ലക്ഷം രൂപയ്ക്ക് ഭൂമി വിറ്റത്. രജിസ്‌ട്രേഷനും മറ്റും പൂര്‍ത്തിയാക്കുന്നതിനായി ഇന്നലെ രജിസ്ട്രാര്‍ ഓഫീസില്‍ പോയിരുന്നു.
അതിന് ശേഷം സ്ഥലം വാങ്ങിയ വ്യക്തിയില്‍ നിന്ന് പണവും വാങ്ങി, ഓഫീസിന് മുന്നിലുള്ള മരച്ചുവട്ടില്‍ ഇരുന്ന് എണ്ണി നോക്കുമ്പോഴാണ് കുരങ്ങ് പണം തട്ടിപ്പറിച്ച്‌ ഓടിയത്.

മരത്തിന് മുകളില്‍ കയറിയ കുരങ്ങ് നോട്ടുകള്‍ താഴേക്ക് എറിഞ്ഞതോടെ ആളുകള്‍ ഓടിക്കൂടി. ഒടുവില്‍ നാട്ടുകാരുടെ സഹായത്തോടെയാണ് ഭഗ്‌വീന്ദറിന് പണം തിരികെ ലഭിച്ചത്.
അവര്‍ പഴങ്ങളും മറ്റും നല്‍കിയ ശേഷമാണ് പണം തിരികെ കൊടുത്തത്. അപ്പോഴേക്കും 500 രൂപയുടെ 14 നോട്ടുകള്‍ കുരങ്ങ് കീറിയിരുന്നു. സഹായിച്ച നാട്ടുകാരോട് നന്ദിയുണ്ടെന്ന് ഭഗ്‌വന്ദീന്‍ പറഞ്ഞു.