![“Manju”](https://santhigirinews.org/wp-content/uploads/2020/04/YOUTUBE.jpg")
കൊല്ലം: കൊവിഡ് പ്രതിരോധ പ്രവര്‍ത്തനങ്ങള്‍ക്ക് ഊര്‍ജം പകര്‍ന്ന് ജില്ലയില്‍ ആദ്യഘട്ട വിതരണത്തിനുള്ള വാക്‌സിനെത്തി. തിരുവനന്തപുരം റീജിയണല്‍ വാക്‌സിന്‍ സ്റ്റോറില്‍ നിന്ന് 25,960 ഡോസ് കൊവിഡ് വാക്‌സിന്‍ (കൊവിഷീല്‍ഡ്) ഇന്നലെ ഉച്ചയ്ക്ക് ഒന്നോടെയാണ് കൊല്ലം സ്കൂള്‍ ഒഫ് നഴ്‌സിംഗ് അങ്കണത്തില്‍ എത്തിച്ചത്. ജില്ലാ മെഡിക്കല്‍ ഓഫീസര്‍ ഡോ. ആര്‍. ശ്രീലത, ആര്‍.സി.എച്ച്‌ ഓഫീസര്‍ ഡോ.വി. കൃഷ്ണവേണി, ജില്ലാ പ്രോഗ്രാം മാനേജര്‍ ഡോ. എസ് ഹരികുമാര്‍, ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ.ജെ. മണികണ്ഠന്‍ എന്നിവര്‍ ചേര്‍ന്ന് വാക്‌സിന്‍ ഏറ്റുവാങ്ങി.
നാളെ മുതല്‍ ജില്ലയിലെ തിരഞ്ഞെടുക്കപ്പെട്ട ഒന്‍പത് കേന്ദ്രങ്ങളില്‍ വാക്‌സിന്‍ വിതരണം നടത്തും. ആദ്യ ഘട്ടത്തില്‍ രജിസ്റ്റര്‍ ചെയ്ത സര്‍ക്കാര്‍ – വകാര്യ മേഖലയിലെ ആരോഗ്യ പ്രവര്‍ത്തകര്‍ക്കാണ് കുത്തിവയ്പ്പ് നല്‍കുന്നത്. രണ്ടാംഘട്ടത്തില്‍ കൊവിഡ് പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് മുന്‍നിരയില്‍ നില്‍ക്കുന്ന ഉദ്യോഗസ്ഥര്‍ക്കും മൂന്നാംഘട്ടത്തില്‍ 50 വയസിന് മുകളില്‍ പ്രായമുള്ളവര്‍ക്കും വാക്‌സിന്‍ നല്‍കും.
ഒരു ദിവസം ഒരു കേന്ദ്രത്തില്‍ 100 പേര്‍ക്കാണ് കുത്തിവയ്പ്പ് നല്‍കുന്നത്. ആദ്യ ഡോസ് എടുത്തവര്‍ ഉറപ്പായും അടുത്ത ഡോസ് എടുക്കണം. രണ്ടുപ്രാവശ്യം വാക്‌സിന്‍ എടുത്താല്‍ മാത്രമേ ഫലം ലഭിക്കൂ. 28 ദിവസങ്ങള്‍ക്കുള്ളിലാണ് രണ്ടാമത്തെ വാക്‌സിന്‍ എടുക്കേണ്ടത്. വാക്‌സില്‍ വിതരണം കൊവിഡ് പ്രോട്ടോക്കോള്‍ പാലിച്ച്‌ പൂര്‍ത്തിയാകാന്‍ സമയമെടുക്കുമെന്നും അതുവരെ ജനങ്ങള്‍ ജാഗ്രത പുലര്‍ത്തണമെന്നും ജില്ലാ മെഡിക്കല്‍ ഓഫീസര്‍ ഡോ. ആര്‍. ശ്രീലത പറഞ്ഞു.
വാക്സിനേഷന് കേന്ദ്രങ്ങള്
1.ഗവ. മെഡിക്കല്‍ കോളേജ്, കൊല്ലം, പാരിപ്പള്ളി
2. കൊല്ലം വിക്ടോറിയ ആശുപത്രി
3. ജില്ലാ ആയുര്വേദ ആശുപത്രി, കൊല്ലം
4. മെഡിസിറ്റി മെഡിക്കല്‍ കോളേജ്, (പാലത്തറ ബ്ലോക്ക്)
5. താലൂക്ക് ആസ്ഥാന ആശുപത്രി, പുനലൂര്
6. താലൂക്ക് ആസ്ഥാന ആശുപത്രി, കരുനാഗപ്പള്ളി
7. ചവറ സാമൂഹ്യാരോഗ്യ കേന്ദ്രം
8. നെടുമണ്കാവ് സാമൂഹ്യാരോഗ്യ കേന്ദ്രം
9. കുടുംബാരോഗ്യ കേന്ദ്രം മാങ്കോട് ചിതറ
