കോട്ടയം: മലങ്കര ഓര്ത്തഡോക്സ് സഭാ തലവന് പരിശുദ്ധ ബസേലിയോസ് മാര്ത്തോമാ പൗലോസ് ദ്വിതീയന് കാതോലിക്കാ ബാവ (74) കാലം ചെയ്തു. ഇന്ന് പുലര്ച്ചെ പരുമല സെന്റ് ഗ്രിഗോറിയോസ് ആശുപത്രിയിലായിരുന്നു അന്ത്യം. അര്ബുദ ബാധിതനായി ഒന്നര വര്ഷമായി ആശുപത്രിയില് ചികിത്സയിലായിരുന്നു. ആരോഗ്യനില ഗുരുതരമായതിനെ തുടര്ന്ന് വെന്റിലേറ്ററിന്റെ സഹായത്തോടെയാണ് ഏതാനും ദിവസങ്ങളായി ജീവന് നിലനിര്ത്തിയിരുന്നത്.
കോട്ടയം ദേവലോകം അരമനയില് ഭൗതിക ശരീരം പൊതുദര്ശനത്തിന് വയ്ക്കും. കബറടക്കം നാളെ നടക്കും. ഓര്ത്തഡോക്സ് സഭാ അധ്യക്ഷനും മലങ്കര മെത്രാപ്പോലീത്തയുമായ അദ്ദേഹം തൃശൂര് കുന്നംകുളത്താണ് ജനിച്ചത്. 1972 ല് ശെമ്മാശ പട്ടം ലഭിച്ച അദ്ദേഹം 2010 നവംബര് 1ന് പരുമല സെമിനാരിയില് വെച്ച് കാതോലിക്കാ ബാവയായി വാഴിക്കപ്പെട്ടു.