മുംബൈ: ഇന്ത്യയുടെ പരമോന്നത കായിക പുരസ്കാരമായ രാജീവ് ഗാന്ധി ‘ഖേല് രത്ന’ പുരസ്കാരത്തിന്റെ പേരില് നിന്ന് മുന് പ്രധാനമന്ത്രി രാജീവ് ഗാന്ധിയുടെ പേര് നീക്കം ചെയ്ത കേന്ദ്ര നടപടിക്ക് പിന്നാലെ രാജീവ് ഗാന്ധിയുടെ പേരില് ഒരു പുരസ്കാരം തന്നെ ഏര്പ്പെടുത്തി മഹാരാഷ്ട്ര സര്ക്കാര്.
രാജ്യത്തെ വിവരസാങ്കേതിക മേഖലയിലെ മികച്ച സംഘടനകള്ക്ക് ഏര്പ്പെടുത്തിയ ഐ.ടി പുരസ്കാരത്തിനാണ് ഉദ്ധവ് താക്കറെ സര്ക്കാര് രാജീവ് ഗാന്ധിയുടെ പേരു നല്കാന് തീരുമാനിച്ചിരിക്കുന്നത്. രാജീവ് ഗാന്ധിയുടെ ജന്മവാര്ഷികമായ ഓഗസ്റ്റ് 20 ന് പുരസ്കാരം ഔദ്യോഗികമായി പ്രഖ്യാപിക്കും.
ഈ വര്ഷം പുരസ്കാര ജേതാക്കളെ ഒക്ടോബര് മുപ്പതിനകം മാത്രമേ തിരഞ്ഞെടുക്കൂ. മഹാരാഷ്ട്ര ഇന്ഫര്മേഷന് ടെക്നോളജി കോര്പ്പറേഷനാണ് അവാര്ഡ് ജേതാക്കളെ തിരഞ്ഞെടുക്കുക. രാജീവ് ഗാന്ധി ഖേല്രത്ന പുരസ്കാരത്തിന്റെ പേര് ‘മേജര് ധ്യാന് ചന്ദ് ഖേല് രത്ന പുരസ്കാരം’ എന്ന് കേന്ദ്രസര്ക്കാര് മാറ്റിയത് കഴിഞ്ഞ ആഴചയായിരുന്നു .