ന്യൂഡല്ഹി: രാജ്യത്തെ പ്രതിദിന കൊവിഡ് കേസുകളില് നേരിയ കുറവ് റിപ്പോര്ട്ട് ചെയ്തു. കേന്ദ്ര ആരോഗ്യ മന്ത്രാലയത്തിന്റെ കണക്കുകള് പ്രകാരം രാജ്യത്ത് കഴിഞ്ഞ ദിവസം 38,667 പേര്ക്കാണ് കൊവിഡ് സ്ഥിരീകരിച്ചത്. 478 പേര്ക്ക് കൂടി ജീവന് നഷ്ടപ്പെട്ടു. കഴിഞ്ഞ ദിവസം 35,743 പേര് രോഗമുക്തി നേടിയതോടെ രാജ്യത്തെ രോഗമുക്തി നിരക്ക് 97.46 ശതമാനമായി. 3,87,673 പേര് നിലവില് രാജ്യത്ത് ചികിത്സയില് തുടരുന്നു.
തുടര്ച്ചയായ 20-ാം ദിവസവും രാജ്യത്തെ കൊവിഡ് പോസിറ്റിവിറ്റി നിരക്ക് 3 ശതമാനത്തില് താഴെയാണ്. നിലവില് പ്രതിദിന കൊവിഡ് പോസിറ്റിവിറ്റി നിരക്ക് 1.73 ശതമാനമാണ്.അതേസമയം രാജ്യത്ത് കൊവിഡ് വാക്സിന് സ്വീകരിച്ചവരുടെ എണ്ണം 53 കോടി കവിഞ്ഞു.
ഇതുവരെ 53 കോടി 61 ലക്ഷം വാക്സിന് വിതരണം ചെയ്തുവെന്ന് കേന്ദ്ര ആരോഗ്യ മന്ത്രാലയം അറിയിച്ചു.ഓഗസ്റ്റ് മാസത്തില് കേന്ദ്ര സര്ക്കാരിന് 20 കോടി ഡോസ് വാക്സിന് വിതരണം ചെയ്യാന് കഴിയുമെന്നാണ് പ്രതീക്ഷയെന്ന് കേന്ദ്ര ആരോഗ്യ മന്ത്രാലയം വ്യക്തമാക്കി.