ന്യൂഡല്ഹി: ലഡാഖ് അതിര്ത്തിയില് ചൈന പുതിയ അസ്വസ്ഥത സൃഷ്ടിക്കുന്നുവെന്ന റിപ്പോര്ട്ടിനിടയില്, ചൈന നിര്മ്മിക്കുന്ന കാറുകള് ഇന്ത്യയില് വില്ക്കരുതെന്ന് യുഎസ് ആസ്ഥാനമായുള്ള ഇലക്ട്രിക് വാഹന നിര്മാതാക്കളായ ടെസ്ലയോട് ആവശ്യപ്പെട്ടു കേന്ദ്ര ഗതാഗത, ഹൈവേ മന്ത്രി നിതിന് ഗഡ്കരി. ടെസ്ല നിര്മാണ മേധാവി ഇലോണ് മസ്കിനോട് നടത്തിയ ഒരു സംഭാഷണത്തിലാണ് ഗഡ്കരി ഇക്കാര്യം ആവശ്യപ്പെട്ടത്.
അദ്ദേഹം തന്നെയാണ് ഇത് വെളിപ്പെടുത്തിയിരിക്കുന്നത്. ‘ചൈനയില് നിര്മ്മിച്ച ഇലക്ട്രിക് കാറുകള് ഇന്ത്യയില് വില്ക്കരുതെന്ന് ഞാന് ടെസ്ലയോട് ആവശ്യപ്പെട്ടിട്ടുണ്ട്. ഇന്ത്യയില് ഇലക്ട്രിക് കാറുകള് നിര്മ്മിക്കാനും ഇന്ത്യയില് നിന്ന് കാറുകള് കയറ്റുമതി ചെയ്യാനും ഞാന് കമ്പനിയോട് പറഞ്ഞിട്ടുണ്ട്.’ ഒരു പരിപാടിയില് സംസാരിക്കവെ മന്ത്രി പറഞ്ഞു.
ടെസ്ല തങ്ങളുടെ വാഹനങ്ങള്ക്ക് 35 ലക്ഷം രൂപ വില നല്കണമെന്ന് മന്ത്രി പറഞ്ഞു. ആത്മനിര്ഭര് പദ്ധതി പ്രകാരം വൈദ്യുത ബാറ്ററികളുടെ പ്രാദേശിക ഉത്പാദനം വര്ദ്ധിച്ചുകൊണ്ടിരിക്കുകയാണെന്നും സമീപഭാവിയില് ഇന്ത്യ ഇലക്ട്രിക് ബാറ്ററികള് കയറ്റുമതി ചെയ്യുമെന്നും അദ്ദേഹം പറഞ്ഞു. ലോകത്തിലെ അഞ്ചാമത്തെ വലിയ വാഹന വിപണിയായ ടെസ്ലയുടെ ബിസിനസ്സ് ഇന്ത്യയില് സ്ഥാപിക്കുന്നതില് ഇത് ഒരു അധിക നേട്ടമായിരിക്കും.
ടെസ്ലയുടെ യൂണിറ്റ് ഇന്ത്യയില് സ്ഥാപിക്കുന്നതിന് ആവശ്യമായ എല്ലാ പിന്തുണയും നരേന്ദ്ര മോദി സര്ക്കാര് നല്കുമെന്ന് മന്ത്രി നിതിന് ഗഡ്കരി പറഞ്ഞു. നികുതി ഇളവുകളുമായി ബന്ധപ്പെട്ട കമ്പനിയുടെ ആവശ്യം സംബന്ധിച്ച് ടെസ്ലയുമായി ചര്ച്ചകള് പുരോഗമിക്കുകയാണെന്ന് അദ്ദേഹം അറിയിച്ചു.