തഞ്ചാവൂര് : തമിഴ്നാട്ടില് ശൈശവ വിവാഹം നടത്തിയ 6 പേര് അറസ്റ്റില്. രാജ (51), അയ്യാവു (55), രാമന് (62), ഗോപു (38), നദിമുത്തു (40), കണ്ണിയന് (50) എന്നിവരാണ് അറസ്റ്റിലായത്.
പ്രായപൂര്ത്തിയാകാത്ത ആണ്കുട്ടിയെയും പെണ്കുട്ടിയെയും ഒരു കൂട്ടം ഗ്രാമവാസികള് ‘കാമുകന്മാരാണെന്ന്’ കണ്ടെത്തിയതിനെ തുടര്ന്ന് നിര്ബന്ധിച്ച് വിവാഹം കഴിപ്പിച്ചു. തഞ്ചാവൂര് ജില്ലയിലെ തിരുവോണത്തിനടുത്താണ് സംഭവം. ചൊവ്വാഴ്ച പുലര്ച്ചെയാണ് ഇരുവരും പരസ്പരം സംസാരിക്കുന്നത് കണ്ടെത്തിയത്.
ആണ്കുട്ടിക്ക് 17ഉം പെണ്കുട്ടിക്ക് 16ഉം വയസ്സാണ് പ്രായം. 12-ാം ക്ലാസില് പഠിക്കുന്ന ഇവര് ഒരേ സ്കൂളിലാണ് പഠിക്കുന്നത്. തിങ്കളാഴ്ച രാത്രി സുഹൃത്തിനൊപ്പം ആണ്കുട്ടി പെണ്കുട്ടിയുടെ വീട്ടിലേക്ക് പോയിരുന്നു. പുലര്ച്ചെ 12.30 ഓടെ അവര് ഒരുമിച്ച് സംസാരിക്കുന്നത് കുറച്ച് ഗ്രാമീണര് കണ്ടെത്തിയതായി റിപ്പോര്ട്ടുകള് പറയുന്നു.
ഇവര് കാമുകന്മാരാണെന്ന് അറിഞ്ഞതോടെ ഗ്രാമവാസികള് മാതാപിതാക്കളെ വിവരമറിയിക്കുകയും അവര് സ്ഥലത്തെത്തി. തുടര്ന്ന് ഗ്രാമവാസികള് മാതാപിതാക്കളെ കുട്ടികളെ വിവാഹം കഴിപ്പിക്കാന് നിര്ബന്ധിച്ചു.
ഗ്രാമവാസികളുടെ സമ്മര്ദത്തെ തുടര്ന്ന് ചൊവ്വാഴ്ച പുലര്ച്ചെ മൂന്ന് മണിയോടെ ഒരു ക്ഷേത്രത്തില് വെച്ച് മാതാപിതാക്കള് ശൈശവ വിവാഹം നടത്തി. സംഭവം പുറത്തറിഞ്ഞതോടെ തിരുവോണ പഞ്ചായത്ത് യൂണിയന് വെല്ഫെയര് ഓഫീസര് കമലാദേവി പോലീസില് വിവരമറിയിച്ചു.
തുടര്ന്ന് നടത്തിയ അന്വേഷണത്തില് പ്രായപൂര്ത്തിയാകാത്തവരെ നിര്ബന്ധിച്ച് വിവാഹം കഴിച്ചതിന് ആറുപേരെ അറസ്റ്റ് ചെയ്തു. ആണ്കുട്ടിയെ തഞ്ചാവൂരിലെ ജുവനൈല് ഹോമിലേക്കും പെണ്കുട്ടിയെ സര്ക്കാര് ഹോമിലേക്കും അയച്ചു.