ചെന്നൈ: തമിഴ്നാട്ടില് കോവിഡ് വ്യാപനത്തിന്റെ പശ്ചാത്തലത്തില് ഏര്പ്പെടുത്തിയ ലോക്ഡൗണ് അടുത്തമാസം രണ്ടുവരെ തുടരുമെന്ന് മുഖ്യമന്ത്രി എം.കെ. സ്റ്റാലിന് അറിയിച്ചു. അതേസമയം പ്രതിദിന കോവിഡ് വ്യാപനം കുത്തനെ കുറഞ്ഞത്തിന്റെ പശ്ചാത്തലത്തില് നഴ്സറി സ്കൂളുകളും പ്ലേ സ്കൂളുകളും ഉള്പ്പെടെ തുറക്കാനും സര്ക്കാര് തീരുമാനിച്ചു.
സിനിമാതീയറ്ററുകളില് മുഴുവന് സീറ്റുകളിലും കാണികളെ അനുവദിക്കും. വിവാഹവും വിവാഹവുമായി ബന്ധപ്പെട്ട ചടങ്ങുകളിലും 200 പേരെ വരെ പങ്കെടുപ്പിക്കാം. നേരത്തെ നൂറുപേര്ക്കായിരുന്നു അനുമതി. മരണാനന്തരചടങ്ങുകളില് അന്പതുപേര് എന്നുള്ളത് നൂറായി ഉയര്ത്തിയിട്ടുണ്ട്.
അതേസമയം സാമുദായിക, സാംസ്കാരിക, രാഷ്ട്രീയ സമ്മേളനങ്ങള്ക്കു നിരോധനം തുടരും. അടുത്ത ബുധനാഴ്ച മുതലാണ് കൂടുതല് ഇളവുകള്. ജനുവരി 22 ന് സംസ്ഥാനത്ത് 30,744 കോവിഡ് രോഗികളാണ് ഉണ്ടായിരുന്നതെങ്കില് ഇന്നലെയായപ്പോഴേക്കും രോഗികളുടെ എണ്ണം 3,086 ആയി കുറഞ്ഞു.