ടിക്കറ്റുകള് മറിച്ചുവില്ക്കാന് അവസരം ഒരുക്കി ഫിഫ
ദോഹ: ലോകകപ്പിനുള്ള മാച്ച് ടിക്കറ്റുകള് നേരത്തെ സ്വന്തമാക്കുകയും എന്നാല്, പല കാരണങ്ങളാല് മത്സരം കാണാന് കഴിയില്ലെന്ന് ഉറപ്പിക്കുകയും ചെയ്തവര്ക്ക് മാച്ച് ടിക്കറ്റുകള് മറിച്ചുവില്ക്കാന് അവസരം ഒരുക്കി ഫിഫ. ഔദ്യോഗിക മാച്ച് ടിക്കറ്റ് വില്പനക്കുള്ള വെബ്സൈറ്റായ ‘ഫിഫ ടിക്കറ്റ്സില്’ പുനര്വില്പനക്കുള്ള റീസെയില് പ്ലാറ്റ്ഫോം കഴിഞ്ഞ ദിവസം സജീവമായി. ആഗസ്റ്റ് 16ന് ഖത്തര് സമയം ഉച്ചക്ക് 12 വരെ വിന്ഡോയിലെ ‘ടിക്കറ്റ്സ് ടു റീസെയ്ല്’ ഓപ്ഷന് ഉപയോഗിച്ച് ടിക്കറ്റുകള് മറിച്ചുവില്പന നടത്താം. എന്നാല്, ഈ ഘട്ടത്തിനുശേഷം, ലോകകപ്പിനോട് അടുത്ത സമയത്ത് വീണ്ടും പുനര്വില്പനക്കുള്ള അവസരം നല്കുമെന്ന് ഫിഫ അറിയിച്ചു. ടിക്കറ്റുള്ളവര് തങ്ങളുടെ ഫിഫ അക്കൗണ്ട് ലോഗിന് ചെയ്തുവേണം പുനര്വില്പനക്കുള്ള ഓപ്ഷനില് പ്രവേശിക്കാന്. നേരത്തെ അനുവദിച്ച ഘട്ടങ്ങളില് ടിക്കറ്റുകള് ബുക്ക് ചെയ്ത് പണമടച്ച് സ്വന്തമാക്കിയവര്ക്കാണ് തങ്ങളുടെ പേരിലുള്ള ടിക്കറ്റുകള് വില്പന നടത്താന് അവസരം നല്കുന്നത്.