വീട്ടിലിരുന്ന് മടുത്തു, ഓഫീസിൽ തിരിച്ചെത്തിയതിൽ ഭൂരിഭാഗം ജീവനക്കാരും സന്തുഷ്ടർ

ഇന്ത്യയിൽ ജോലി ചെയ്യുന്ന ഭൂരിഭാഗം പ്രൊഫഷണലുകളും മഹാമാരിക്ക് ശേഷം ഓഫീസിൽ തിരിച്ചെത്തിയതിൽ സന്തുഷ്ടരെന്ന് പഠനം. മാർക്കറ്റ് റിസർച്ച് സ്ഥാപനമായ ഇപ്സോസ് നടത്തിയ സർവേയിലാണ് ഇക്കാര്യം വ്യക്തമാക്കുന്നത്. സർവേയിൽ പങ്കെടുത്തവരിൽ 80 ശതമാനവും സന്തുഷ്ടി പ്രകടിപ്പിച്ചു. കൊറോണ ജീവിതത്തെ താറുമാറാക്കിയതിനാൽ ഏകദേശം രണ്ട് വർഷത്തെ വീട്ടിലെ ജോലിക്ക് ശേഷം ജോലിസ്ഥലങ്ങളിൽ തിരിച്ചെത്തിയതിൽ തങ്ങൾ ആവേശഭരിതരാണെന്ന് ഇവർ പറഞ്ഞു.

സ്ത്രീകളെ അപേക്ഷിച്ച് പുരുഷന്മാർക്കിടയിൽ ഉത്സാഹം കൂടുതലാണെന്ന് മിന്റ് സർവേ റിപ്പോർട്ടിൽ പറഞ്ഞു. സർവേയിൽ പങ്കെടുത്ത 81 ശതമാനം പുരുഷന്മാരും വീണ്ടും ഓഫീസിൽ തിരിച്ചെത്തിയതിൽ സന്തോഷമുണ്ടെന്ന് പറഞ്ഞപ്പോൾ സ്ത്രീകളുടെ ശതമാനം 77 മാത്രമാണ്. മറ്റ് പ്രദേശങ്ങളെ അപേക്ഷിച്ച് പടിഞ്ഞാറൻ ഇന്ത്യയിലെ ആളുകൾ ഓഫീസിലേക്ക് മടങ്ങുന്നതിൽ സന്തോഷവാനായിരുന്നു എന്നതാണ് ശ്രദ്ധേയമായ നിരീക്ഷണം.

പകർച്ചവ്യാധിക്ക് ശേഷം രാജ്യത്തുടനീളമുള്ള ഓഫീസുകൾ വീണ്ടും തുറന്നിരിക്കുകയാണ്. നിയന്ത്രണങ്ങൾ ലഘൂകരിക്കൽ, വാക്‌സിനേഷൻ, കോവിഡ് പ്രോട്ടോക്കോളുകളുടെ ഇളവ് എന്നിവയെല്ലാം വീണ്ടും ഓഫീസുകൾ തുറക്കുന്നതിലേക്ക് നയിച്ചു. സർവേയിൽ പങ്കെടുത്തവരിൽ 10 ൽ 8 പേരും പറഞ്ഞു, തങ്ങളും അവരുടെ കുടുംബാംഗങ്ങളും വീട്ടിലിരുന്ന് ജോലി ചെയ്യുന്നതിൽ നിന്ന് വ്യത്യസ്തമായി ഓഫീസിൽ പോകാൻ തുടങ്ങിയിരിക്കുന്നു.

ഓഫീസിലേക്ക് മടങ്ങുന്നതിന്റെ നേട്ടങ്ങളെ സംബന്ധിച്ചും ജീവനക്കാർ പറഞ്ഞു. മെച്ചപ്പെട്ട തൊഴിൽ-ജീവിത സന്തുലിതാവസ്ഥയ്‌ക്കും മൊത്തത്തിലുള്ള ആരോഗ്യത്തിനും ക്ഷേമത്തിനും ഇത് സംഭാവന നൽകിയതായി ഇവർ വിശദീകരിച്ചു. സ്ഥിരമായി ഓഫീസിൽ പോകുന്നത് ദിനചര്യ നിലനിർത്താൻ സഹായിച്ചതായി സർവേയിൽ പങ്കെടുത്ത 16 ശതമാനം ആളുകളും പറഞ്ഞു. ചിലർ ചൂണ്ടിക്കാണിച്ച മറ്റൊരു നേട്ടം ടീം അംഗങ്ങളുമായുള്ള ഇടപഴകലും മികച്ച സാമൂഹികവൽക്കരണവുമായിരുന്നു.

”പോൾ ചെയ്തവരിൽ ഭൂരിഭാഗവും ഓഫീസിൽ ശാരീരികമായി ഹാജരാകുന്നതിൽ അത്യധികം ഉത്സാഹമുള്ളവരാണ്. വർക്ക് ലൈഫ് ബാലൻസ്, അവരുടെ ടീമുകളുമായി ബന്ധിപ്പിക്കൽ, ഉൽപ്പാദനക്ഷമത കൈകാര്യം ചെയ്യൽ തുടങ്ങിയ കാര്യങ്ങളിൽ അവർ വ്യക്തമായ നേട്ടം കാണുന്നു. നീണ്ട ലോക്ക്ഡൗണുകൾ മിക്കവരുടെയും ജീവിതത്തെ താറുമാറാക്കിയതായി ,” ഇപ്സോസ് ഇന്ത്യ, പബ്ലിക് അഫയേഴ്‌സ് ആൻഡ് കോർപ്പറേറ്റ് റെപ്യൂട്ടേഷൻ ഗ്രൂപ്പ് സർവീസ് ലൈൻ ലീഡർ പാരിജാത് ചക്രവർത്തി പറഞ്ഞു.