തിരുവനന്തപുരം: സ്ത്രീസുരക്ഷയ്ക്കായി തയാറാക്കിയ നിര്ഭയം എന്ന മൊബൈല് ആപ്പ് പുറത്തിറക്കി. മുഖ്യമന്ത്രി പിണറായി വിജയനും പത്നി കമലാവിജയനും ചേര്ന്നാണ് ആപ്പ് പുറത്തിറക്കിയത്. ഈ ആപ്പിലെ ഹെല്പ്പ് എന്ന ബട്ടണ് അഞ്ച് സെക്കന്ഡ് അമര്ത്തിപ്പിടിച്ചാല് ഫോണ് ഉപയോഗിക്കുന്ന ആളിന്റെ ലൊക്കേഷന് ഏറ്റവും അടുത്തുള്ള പൊലീസ് കണ്ട്രോള് റൂമിലോ, പൊലീസ് സ്റ്റേഷനിലോ ലഭിക്കും.
അതേസമയം ഇന്റര്നെറ്റ് കവറേജ് ഇല്ലാതെ തന്നെ ഈ ആപ്പ് മുഖേന സന്ദേശങ്ങളും ലൊക്കേഷനും പൊലീസുമായി പങ്കു വയ്ക്കാം. അക്രമിയുടെ ശ്രദ്ധയില്പ്പെടാതെ തന്നെ ഫോട്ടോയും വീഡിയോയും ചിത്രീകരിക്കാന് കഴിയും. ആന്ഡ്രോയിഡ്, ഐ.ഒ.എസ് പ്ലാറ്റ്ഫോമുകളില് ആപ്പ് ലഭ്യമാണ്. സാമൂഹിക മാധ്യമങ്ങളിലൂടെയും മറ്റും സ്ത്രീകള്ക്കെതിരെ നടക്കുന്ന അതിക്രമങ്ങള് ശക്തമായി നേരിടണമെന്ന് പൊലീസിന് കര്ശനനിര്ദേശം നല്കിയതായി മുഖ്യമന്ത്രി അറിയിച്ചു. ഇത്തരം മാര്ഗങ്ങളിലൂടെ സ്ത്രീകളെ അവഹേളിക്കുന്നത് കണ്ടെത്താന് പൊലീസിലെ ശാസ്ത്രീയ കുറ്റാന്വേഷണവിഭാഗങ്ങള് ശക്തിപ്പെടുത്തുമെന്നും അദ്ദേഹം പറഞ്ഞു.