കൊവിഡിനെപ്പറ്റി ചൈനയ്ക്ക് നേരത്തെ തന്നെ അറിയാമായിരുന്നു
ശ്രീജ.എസ്
ന്യൂഡല്ഹി:കൊവിഡ് 19 ലോകത്തിന്റെ താളം തെറ്റിച്ചിട്ട് മാസങ്ങള് പിന്നിടുന്നു. വൈറസിന്റെ ഉത്ഭവം സംബന്ധിച്ച് നിരവധി ആരോപണങ്ങള് ചൈനയ്ക്കെതിരെ പുറത്ത് വന്നു. ഇപ്പോള് ഇതാ ചൈനീസ് സര്ക്കാരിനെ വീണ്ടും പ്രതിക്കൂട്ടിലാക്കി ഒരു പുതിയ വെളിപ്പെടുത്തല്. ഹോങ്കോഗ് ആസ്ഥാനമായി പ്രവര്ത്തിക്കുന്ന ഒരു വൈറോളജിസ്റ്റാണ് രോഗവ്യാപനം സംബന്ധിച്ച നിര്ണായക വിവരങ്ങള് ചൈന മറച്ചു വെച്ചെന്ന വെളിപ്പെടുത്തലുമായി രംഗത്തെത്തിയിരിക്കുന്നത്. ഹോങ്കോഗ് സ്കൂള് ഓഫ് പബ്ലിക് ഹെല്ത്തിലെ വൈറോളജിസ്റ്റായ ഡോ. ലി മെങ് യാനിന്റെതാണ് ഞെട്ടിക്കുന്ന ആരോപണം.
മാരകമായ വൈറസിനെപ്പറ്റി ചൈനയ്ക്ക് നേരത്തെ തന്നെ അറിയാമായിരുന്നുവെന്നും എന്നാല് ലോകാരോഗ്യസംഘടനയുടെ ഉപദേശകനായ പ്രൊഫസര് മാലിക് പെയ്രിസ് ഇതിനെതിരെ ഒരു നടപടിയും സ്വീകരിച്ചില്ലെന്നാണ് നിലവില് ഒളിവില് കഴിയുന്ന ഡോ. ലി മെങ് യാനിന്റെ വെളിപ്പെടുത്തല് . വൈറസ് ബാധയുടെ വിവരങ്ങള് ചൈന പുറത്തു വിടുന്നതിനു വളരെ മുന്പു തന്നെ അവര്ക്ക് നോവല് കൊറോണ വൈറസിനെപ്പറ്റി അറിയാമായിരുന്നുവെന്ന് ഡോ. യാന് വെളിപ്പെടുത്തി.
വൈറസ് വ്യാപനത്തെപ്പറ്റി ഗവേഷണം നടത്താന് ശ്രമിച്ചെങ്കിലും വൈറോളജി മേഖലയിലെ വിദഗ്ധന് ആയിരുന്നിട്ടും തന്റെ സൂപ്പര്വൈസര് അവയൊക്കെ നിരുത്സാഹപ്പെടുത്തിയെന്നും ലി മെങ് യാന് പറയുന്നു. അന്ന് ഗവേഷണം നടത്താന് ശ്രമിച്ച വൈറസ് രോഗമാണ് ഇന്ന് ലോകം മുഴുവന് പടര്ന്ന കോവിഡ്-19 എന്ന് ഇവര് വ്യക്തമാക്കി. .
വിവരങ്ങള് തുറന്നു പറഞ്ഞ തന്റെ ജീവന് അപകടത്തിലാണെന്നും ഡോ. യാന് വ്യക്തമാക്കി.വൈറസ് ബാധ സംബന്ധിച്ച എല്ലാ വിവരങ്ങളും ലോകത്തിനു വെളിപ്പെടുത്തിയെന്ന ചൈനയുടെ അവകാശവാദങ്ങള്ക്കിടെയാണ് ഡോ. യാന്റെ വെളിപെടുത്തല്.
ലോകത്തു തന്നെ നോവല് കൊറോണ വൈറസിനെപ്പറ്റി ഏറ്റവുമാദ്യം ഗവേഷണം നടത്തിയ ശാസ്ത്രജ്ഞരില് ഒരാളാണ് താനെന്നാണ് ഡോ. യാന് അവകാശപ്പെടുന്നത്. ചൈനയിലെ സെന്റര് ഫോര് ഡിസീസ് കണ്ട്രോള് ആന്റ് പ്രിവന്ഷനിലെ സുഹൃത്തുക്കള് ഈ വൈറസ് മനുഷ്യരില് നിന്ന് മനുഷ്യരിലേയ്ക്ക് പടരുന്നതാണെന്ന് ഡിസംബര് 31ന് തന്നെ വെളിപ്പെടുത്തിയിരുന്നുവെന്നാണ് അവര് പറയുന്നത്. എന്നാല് ജനുവരി 9നു മാത്രമാണ് ചൈനയും ലോകാരോഗ്യസംഘടനയും ഇക്കാര്യം ഔദ്യോഗികമായി സ്ഥിരീകരിക്കുന്നത്.