![“Manju”](https://santhigirinews.org/wp-content/uploads/2020/04/YOUTUBE.jpg")
തിരുവനന്തപുരം: വന്ദേഭാരത് മിഷഷന്റെ ഭാഗമായി കേരളത്തിലേക്ക് ഷെഡ്യൂള്‍ ചെയ്ത ഒരു വിമാനത്തിനും സംസ്ഥാന സര്‍ക്കാര്‍ അനുമതി നിഷേധിച്ചിട്ടില്ലെന്ന് മുഖ്യമന്ത്രി പിണറായി വിജയന്‍. വിദേശകാര്യ മന്ത്രാലയം ആവശ്യപ്പെട്ട എല്ലാ വിമാനങ്ങള്‍ക്കും അനുമതി നല്‍കിയിട്ടുണ്ടെന്നും പിണറായി വ്യക്തമാക്കി.
വന്ദേഭാരതിന്‍റെ രണ്ടാം ഘട്ടത്തില്‍ ഒരു ദിവസം 12 വിമാനങ്ങള്‍ സര്‍വീസ് നടത്തുമെന്നാണ് കേന്ദ്രസര്‍ക്കാര്‍ അറിയിച്ചത്. എന്നാല്‍ ഇത്രയും വിമാനങ്ങള്‍ കേന്ദ്രം ഇപ്പോള്‍ ഷെഡ്യൂള്‍ ചെയ്തിട്ടില്ല. ചാര്‍ട്ടര്‍ വിമാനങ്ങള്‍ക്കും സംസ്ഥാന സര്‍ക്കാര്‍ അനുമതി നല്‍കി. ഏതെങ്കിലും സംഘടനകള്‍ വിമാനം ചാര്‍ട്ട് ചെയ്യുകയാണെങ്കിലും അതിന് അനുമതി നല്‍കുന്നതിനും തടസ്സമില്ലെന്നും പിണറായി കൂട്ടിച്ചേര്‍ത്തു.
എന്നാല്‍, പണം വാങ്ങിയാണ് സംഘടനകള്‍ സര്‍വീസ് നടത്തുന്നതെങ്കില്‍ ഇതിന് ചില നിബന്ധനകള്‍ വെച്ചിട്ടുണ്ട്. ടിക്കറ്റ് നിരക്ക് വന്ദേ ഭാരതിന് സമാനമായിരിക്കണം, മുന്‍ഗണന വിഭാഗങ്ങള്‍ക്ക് ആദ്യം യാത്രക്കുള്ള സൗകര്യമൊരുക്കണം എന്നിവയാണ് നിബന്ധനകളെന്നും മുഖ്യമന്ത്രി വ്യക്തമാക്കി. വന്ദേ ഭാരത് മിഷന്‍റെ ഭാഗമായി കുടുതല്‍ വിമാന സര്‍വീസുകള്‍ നടത്തുന്നതിന് തടസ്സം കേരള സര്‍ക്കാരാണെന്ന് കേന്ദ്രമന്ത്രി വി.മുരളീധരന്‍ പറഞ്ഞിരുന്നു. ഇതിനുള്ള മറുപടിയാണ് മുഖ്യമന്ത്രി ഇന്ന് വാര്‍ത്താ സമ്മേളനത്തില്‍ നല്‍കിയത്.
