14 കോവിഡ് ക്ലസ്റ്ററുകൾ :അതീവ ജാഗ്രതയിൽ കൊല്ലം

 

കൊല്ലം: കൊവിഡിന്റെ സമ്പർക്ക വ്യാപനം കൂടുതലായി റിപ്പോർട്ട് ചെയ്ത മേഖലകൾ കേന്ദ്രീകരിച്ച് ജില്ലയിൽ 14 ക്ലസ്റ്ററുകൾ രൂപീകരിച്ചു. പൊഴിക്കര, ഇരവിപുരം, ചവറ, പന്മന, ആലപ്പാട്, കൊട്ടാരക്കര, അഞ്ചൽ, എരൂർ, ചിതറ, ഇടമുളയ്ക്കൽ, ഇളമാട്, തലച്ചിറ, നെടുമ്പന, ശാസ്താംകോട്ട എന്നിവിടങ്ങളാണ് ക്ലസ്റ്ററുകൾ. ക്ലസ്റ്ററുകളെല്ലാം ക്രിട്ടിക്കൽ കണ്ടെയ്ന്‍മെന്റ്‌ സോണുകളാക്കി കടുത്ത നിയന്ത്രണമേർപ്പെടുത്തി.

ഇവിടുത്തെ പരമാവധി ജനങ്ങളെ കൊവിഡ് പരിശോധനയ്ക്ക് വിധേയമാക്കുകയാണ്. ഏതെങ്കിലും ഒരു പ്രത്യേക മേഖല കേന്ദ്രീകരിച്ച് വലിയ തോതിൽ കൊവിഡ് കേസുകൾ റിപ്പോർട്ട് ചെയ്യുമ്പോഴാണ് പ്രദേശത്തെ ക്ലസ്റ്റർ ആക്കി മാറ്റുന്നത്. ക്ലസ്റ്ററുകളില്‍ പ്രതിരോധ പ്രവർത്തനങ്ങൾക്ക് നേതൃത്വം നൽകുന്നത് ആരോഗ്യ പ്രവർത്തകർ ഉൾപ്പെട്ട റെസ്പോൺസ് ടീം ആണ്. തുടർന്ന് പ്രത്യേകമായി രൂപീകരിക്കുന്ന കൺട്രോൾ റൂമിന്റെ നേതൃത്വത്തിലായിരിക്കും പ്രവർത്തനങ്ങളുടെ ഏകോപനം.

പ്രദേശത്തെ കണ്ടെയ്ന്‍മെന്റ്‌ സോണാക്കി നിശ്ചയിച്ച് ജനങ്ങളുടെ പരസ്പര സമ്പർക്കവും പുറത്തേക്കുള്ള യാത്രകളും തടയും. അവസാനം കൊവിഡ് രോഗം സ്ഥിരീകരിച്ച് ഏഴ് ദിവസത്തിന് ശേഷം അവിടെ പുതിയെ കേസ് ഇല്ലെങ്കിൽ പ്രദേശത്തെ ക്ലസ്റ്ററിൽ നിന്നൊഴിവാക്കും.

ക്ലസ്റ്ററുകളിലെ നിയന്ത്രണങ്ങൾ ഇങ്ങനെ

1. 10 മുതൽ 15 വരെ വീടുകൾ അടങ്ങുന്ന ക്ലസ്റ്റർ ഗ്രൂപ്പുകൾ രൂപീകരിക്കും

2. വാർഡ് തല കർമ്മ സമിതിയുടെ പ്രവർത്തനം ശക്തിപ്പെടുത്തും

3. ക്ളസ്റ്റർ ഗ്രൂപ്പുകൾ തമ്മിൽ പരസ്പര സമ്പർക്കം ഒഴിവാക്കണം.

4. ഗ്രൂപ്പിനുള്ളിലെ അംഗങ്ങൾക്കിടയിലും ശാരീരിക അകലം ഉണ്ടാകണം

5. അത്യാവശ്യങ്ങൾക്ക് പുറത്ത്‌ പോകുന്നവരുടെ വിവരം രേഖപ്പെടുത്തണം

6. തദ്ദേശ സ്ഥാപനങ്ങൾ നേതൃപരമായ ഇടപെടൽ നടത്തണം. വാർഡ് തല ഏകോപന ചുമതല പഞ്ചായത്ത് അംഗങ്ങൾക്കും കൗൺസിലർമാർക്കും

7. ജില്ലാ ഭരണകൂടം വികസിപ്പിച്ചെടുത്ത ഡോർ ടു ഡോർ ആപ്പിന്റെ ഉപയോഗം വ്യാപാര സ്ഥാപനങ്ങൾ പ്രയോജനപ്പെടുത്തണം.

8. പരമാവധി വീടുകളിൽ സാധനങ്ങൾ എത്തിച്ചു നൽകണം.

9. രണ്ട് കിലോമീറ്റർ പരിധിക്കുള്ളിൽ സൗജന്യമായും അത് കഴിഞ്ഞ് നിശ്ചിത തുകയും ഈടാക്കാം.

10. കടകളിൽ പകുതി മാത്രം ഒന്നിടവിട്ട ദിവസങ്ങളിൽ വീതം പ്രവർത്തിപ്പിക്കാം