കൊണ്ടോട്ടി: കരിപ്പൂര് വിമാനത്താവളത്തില് നിന്നു വലിയ വിമാനങ്ങളുടെ സര്വീസ് ആരംഭിക്കുന്നതിന് വിമാന കമ്പനികള്ക്കു പുതിയ സ്റ്റാന്ഡേര്ഡ് ഓപ്പറേറ്റിംഗ് പ്രൊസീജര്(എസ്ഒപി) സമര്പ്പിക്കാന് നിര്ദേശം നല്കി. കരിപ്പൂരില് വലിയ വിമാനങ്ങളുടെ സര്വീസ് ആരംഭിക്കുന്നതിനു മുന്നോടിയായി ചേര്ന്ന അന്തിമ സുരക്ഷ വിലയിരുത്തല് യോഗത്തിലാണ് തീരുമാനം.
ടെയ്ല് വിന്ഡിലെ ലാന്ഡിംഗ്, ഒട്ടോമാറ്റിക് ബ്രേക്കിംഗിന് ആവശ്യമായ റണ്വേ നീളം തുടങ്ങിയവ ഉള്പ്പെടുത്തിയാണ് ഡയറക്ടറേറ്റ് ജനറല് ഓഫ് സിവില് ഏവിയേഷന്(ഡിജിസിഎ)പുതിയ എസ്ഒപി സമര്പ്പിക്കാന് നിര്ദേശിച്ചത്. വിമാനത്താവള ഉന്നത ഉദ്യോഗസ്ഥരുടെയും വിമാനകമ്പനി പ്രതിനിധികളുടെയും യോഗത്തില് എയര്ഇന്ത്യ, സൗദി എയര്ലൈന്സ്, എമിറേറ്റ്സ്, ഖത്തര് എയര്വെയ്സ് പ്രതിനിധികള് ഓണ്ലൈന് വഴിയാണ് പങ്കെടുത്തത്.
കരിപ്പൂരില് സര്വീസ് നടത്തുന്നതിനാവശ്യമായ സുരക്ഷാനടപടികള് സജ്ജമാണെന്ന് യോഗം വിലയിരുത്തി. ഓഗസ്റ്റ് ഏഴിനുണ്ടായ വിമാനാപകടത്തെ തുടര്ന്നാണ് കരിപ്പൂരില് വലിയ വിമാനങ്ങള്ക്ക് നിയന്ത്രണം ഏര്പ്പെടുത്തിയത്. പിന്നീട് നവംബര് 25ന് വ്യോമയാന മന്ത്രാലയം നിശ്ചയിച്ച വിദഗ്ധ സംഘം കരിപ്പൂരിലെത്തി പഠനം നടത്തി വിശദമായ റിപ്പോര്ട്ട് നല്കിയിരുന്നു.
ഇവരുടെ റിപ്പോര്ട്ടില് ഉന്നയിച്ചിരിക്കുന്ന പ്രശ്നങ്ങള് പരിഹരിച്ച് എയര്പോര്ട്ട് അഥോറിറ്റി ഡിജിസിഎക്ക് ഡിസംബര് 18ന് റിപ്പോര്ട്ട് നല്കിയിരുന്നു. ഇതിന്റെ തുടര്നടപടികളുടെ ഭാഗമായാണ് സുരക്ഷ വിലയിരുത്തല് യോഗം ചേര്ന്നത്.