![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: േകന്ദ്രസര്‍ക്കാറിന്‍റെ കാര്‍ഷിക നിയമങ്ങള്‍ക്കെതിരെ ഡല്‍ഹി സിംഘു അതിര്‍ത്തിയില്‍ പ്രതിഷേധിക്കുന്ന കര്‍ഷകരെ ഒഴിപ്പിക്കണമെന്നാവശ്യപ്പെട്ട് പ്രതിഷേധം. സിംഘു അതിര്‍ത്തിയില്‍ താമസിക്കുന്നവരെന്ന് അവകാശപ്പെടുന്ന ആളുകളുടെ നേതൃത്വത്തിലാണ് പ്രതിഷേധം.
‘സിംഘു അതിര്‍ത്തി ഒഴിപ്പിക്കുക’ എന്ന മുദ്രാവാക്യവുമായി ദേശീയ പതാകയുമേന്തി ഇവര്‍ റോഡുകളിലെത്തി പ്രതിഷേധിക്കുകയായിരുന്നു. സിംഘു അതിര്‍ത്തിയില്‍നിന്ന് കര്‍ഷകര്‍ ഒഴിഞ്ഞുപോകണമെന്നാണ് പ്രതിഷേധക്കാരുടെ ആവശ്യം.
സിംഘു അതിര്‍ത്തിയില്‍ കര്‍ഷകര്‍ പ്രതിഷേധവുമായി എത്തിയതുമുതല്‍ തന്‍റെ ബിസിനസിനെ പ്രതികൂലമായി ബാധിച്ചെന്ന് പ്രതിഷേധക്കാരില്‍ ഒരാള്‍ ഇന്ത്യ ടുഡെയോട് പറഞ്ഞു. റിപബ്ലിക് ദിനത്തില്‍ ദേശീയ പതാകയെ കര്‍ഷകര്‍ അപമാനിച്ചുവെന്ന് മറ്റൊരാള്‍ കൂട്ടിച്ചേര്‍ത്തു.
നവംബര്‍ 28 മുതല്‍ പഞ്ചാബ്, ഹരിയാന, ഉത്തര്‍പ്രദേശ് എന്നിവിടങ്ങളില്‍നിന്നുള്ള കര്‍ഷകര്‍ ഡല്‍ഹിയിലെ സിംഘു, ഗാസിപൂര്‍, ടിക്രി അതിര്‍ത്തികളില്‍ പ്രതിഷേധിക്കുകയാണ്. റിപബ്ലിക് ദിനത്തില്‍ കര്‍ഷക സംഘടനകളുടെ നേതൃത്വത്തില്‍ നടത്തിയ ട്രാക്ടര്‍ റാലിയില്‍ പരക്കെ അക്രമം അരങ്ങേറിയിരുന്നു. പൊലീസുകാര്‍ സമരം ബലപ്രയോഗത്തിലൂടെ അടിച്ചമര്‍ത്താനും ശ്രമിച്ചു. അക്രമം നടത്തിയത് പ്രതിഷേധിക്കുന്ന കര്‍ഷകര്‍ അല്ലെന്ന് കര്‍ഷക സംഘടനകള്‍ അറിയിച്ചിരുന്നു.
