റാങ്ക് ലിസ്റ്റ് നീട്ടിയാല്‍ ജോലി കിട്ടുമോ -കടകംപള്ളി

തിരുവനന്തപുരം: എല്‍.ജി.എസിന്റെ റാങ്ക് ലിസ്റ്റ് പത്ത് വര്‍ഷം നീട്ടിയാലും നിങ്ങള്‍ക്കൊക്കെ ജോലി കിട്ടുമോ സഹോദരി, സമരം ചെയ്ത് ഞങ്ങളെ എന്തിനാണ് നാണം കെടുത്തിയതെന്ന് മന്ത്രി കടകംപള്ളി സുരേന്ദ്രന്‍. സമരം ചെയ്യുന്ന ലയ രാജേഷും മറ്റു രണ്ട് പേരും തിങ്കളാഴ്ച രാവിലെ മന്ത്രിയുടെ ഔദ്യോഗികവസതിയിലെത്തി കണ്ടപ്പോഴാണ് ഇക്കാര്യം ചോദിച്ചത്. റാങ്ക് നമ്പര്‍ എത്രയാണെന്ന് ആദ്യം മന്ത്രി ചോദിച്ചു. 583 എന്ന് പറഞ്ഞപ്പോഴാണ് മന്ത്രി ഇത്തരത്തില്‍ പ്രതികരിച്ചത്.

മന്ത്രിയുടെ പ്രതികരണം സങ്കടപ്പെടുത്തിയെന്നും തിരിച്ച് മറുപടി നല്‍കാന്‍ അവസരം ലഭിച്ചില്ലെന്നും ലയ രാജേഷ് പറഞ്ഞു. മന്ത്രിയുടെ കുറ്റംകൊണ്ടല്ല അദ്ദേഹം ഇത്തരത്തില്‍ പ്രതികരിച്ചത്. ഉദ്യോഗസ്ഥരടക്കം അദ്ദേഹത്തെ തെറ്റിദ്ധരിപ്പിച്ചിരിക്കുകയാണ്. ഇനി ഏത് രീതിയിലാണ് സര്‍ക്കാരിനെ സമീപിക്കേണ്ടതെന്ന് അറിയാത്ത സാഹചര്യത്തിലാണ് ഞങ്ങള്‍. അനുകൂലമായ ഉത്തരവുണ്ടായില്ലെങ്കില്‍ ഇന്ന് വൈകുന്നേരം മുതല്‍ അനിശ്ചിതകാല നിരാഹാരം ആരംഭിക്കും– അവര്‍ വ്യക്തമാക്കി.

തിങ്കളാഴ്ച രാവിലെ 6.45ന് തന്നെ കാണാന്‍ മൂന്ന് റാങ്ക് ഹോള്‍ഡേഴ്‌സ് എത്തിയെന്ന് മന്ത്രി കടകംപള്ളി സുരേന്ദ്രന്‍ സമ്മതിച്ചു. സമരക്കാരുമായി സെക്രട്ടറി ചര്‍ച്ച നടത്തിയില്ലേ എന്ന് ചോദിച്ചെന്നും അതിനിടെ ഓരോരുത്തരുടെയും റാങ്ക് നമ്പര്‍ ചോദിച്ചെന്നും മന്ത്രി പറഞ്ഞു. അത് കേട്ട ശേഷം റാങ്ക് ലിസ്റ്റ് പത്ത് വര്‍ഷം നീട്ടിയാലും നിങ്ങള്‍ക്കൊക്കെ ജോലി കിട്ടുമോ എന്ന് ചോദിച്ചെന്നും മന്ത്രി ഒരു വാര്‍ത്താചാനലിനോട് പറഞ്ഞു.

മന്ത്രി പഠിച്ചിട്ടല്ല പ്രതികരിച്ചതെന്ന് സമരക്കാര്‍ പറഞ്ഞു. സമരത്തിന്റെ യഥാര്‍ത്ഥ ആവശ്യം മന്ത്രിക്ക് പോലും മനസ്സിലായിട്ടില്ല. തൃശൂര്‍ ജില്ലയിലെ എല്‍.ഡി.എസിന് 500ലധികം റാങ്ക് പിന്നിട്ടവര്‍ക്ക് അഡ്വൈസ് മെമ്മോ നല്‍കിയിട്ടുണ്ട്. അതുകൊണ്ട് 583 മോശം റാങ്ക് അല്ലെന്ന് ലയ രാജേഷ് പറഞ്ഞു.